Ætti på Øy tek til med Hans (Nilsson). Han er øydegardsmann og reider ut saltverkskatt 1619. Fyri han er Nils nemnd 1609. Truleg er det faren. Hans Øy fær ein noko kjennskap til frå eir gåvebrev som vermor hans, Aashild Torgrimsdotter, g. m. Jørund Nordbø i Nissedal, sette upp på Øy 1634. Ho var gamal då og takkar Hans for husvære, tilsyn og stell på Øy. Den landskyldi - det var for 17 år som Hans var skuldig Aashild og henars ervingar, skal han vera kvitt og fri. Ervingane, og m. dei Anstein Tveitane, var lite nøgde med det og i 1649 stemner dei Hans Øy til tings i Skien. Dei meinte dei hadde like god åsæterett til Øy som han.

    Hans la fram gåvebrev og skiftebrev, stadfeste ved 6 manns-dom. Han heldt på retten sin til denne garden - “som hand mestepartt aff Skoug og March selffuer haffuer oprydditt, Epterdj, den tid hand kom der først var dett iche anderledis end en Setterboll.” Han hadde bygt og husa upp der, hadde sete på Øy i vel 36 år og åtte sjav mest i garden. Hans Øy fekk medhald av retten. Han og ervingane skulle eige og bruke garden, slik skiftebrev og dom lydde. - Ætti etter Hans kom til velstand og makt på Øy.